Sarako Idazleen Biltzarra eta Liburu Azoka ospatu zen atzo. Beste batzuen artean, onomastika zeharka ikutzen duten bi lagunen liburu bana aurkitu genituen bertan.

Batetik, labetik atera berria zen Xabier Elosegiren lana kausitu genuen. 1793-1872 urte bitarteko Hegoaldeko gizonen eta Iparraldeko emakumeen arteko ezkontzak miatu ditu zehatz-mehatz Lapurdin erroak emandako tolosarraren lan finak. Hendaia, Biriatu, Ziburu, Urruña, Azkaine, Sara, Senpere eta Ainhoa herrietako ezkontza hauek ezkontza guztien %10-30 dira. Hegoaldeko deiturek Iparraldean izan duten zabalkundea ulertzera ere bideratua da lana eta horretarako ezinbesteko lanabesa dugu eta holako beste lan batzuetarako eredua. Zorionak Xabier.

Ahotan hartu behar dugun bigarren liburua ez da hain berria baina gaurkotasunik ez du batere galdu. Ezagutzen genuen lehendik deiturei buruz Marikita Tanburinek eginiko lanxume baina paregabea eta emazteak ezkontzeko orduan deitura galtzeari buruzko haren iritzi kritikoa. “Aitaren, senarraren ala amaren izena” eta “Euskal emazteak” goiburuko bi gogoetak osatzen dute liburua eta bietan ere ikutzen du emazteen deituren gai eta horren inguruko gorabeherak, historikoak zein sozialak. Zorionak, azteko partez kasu honetan, Marikitari ere.

Liburu biak, Iparraldean gutxika-gutxika zabaltzen ari den usadio berriari jarraiki, elebidunak dira liburu biak, frantses zein euskaldun irakurleen eskura jartzeko.